Olmaotadan 40 nafar o‘zbekistonlik deportatsiya qilindi
Aniqlangan shaxslar migratsiya tartiblarini buzgan va shu sababli qonunchilikka muvofiq ravishda mamlakatdan chiqarib yuborilgan.
Qozog‘istonning Olmaota shahrida migratsiya qonunchiligini buzganlikda ayblangan 40 nafar O‘zbekiston fuqarosi mamlakatdan deportatsiya qilindi. Bu haqda mahalliy huquqni muhofaza qiluvchi organlar ma’lumotlariga tayanib Kazinform xabar berdi.
Olmaota politsiya departamenti Migratsiya xizmati rahbari Yerkin Amantayevning ta’kidlashicha, aniqlangan shaxslar migratsiya tartiblarini buzgan va shu sababli qonunchilikka muvofiq ravishda mamlakatdan chiqarib yuborilgan. Uning so‘zlariga ko‘ra, asosiy vazifa — qonuniylik va jamoat tartibini ta’minlash, shuningdek, shahar hududida bo‘lib turgan barcha xorijiy fuqarolar tomonidan qonunlarga rioya etilishini nazorat qilishdan iborat.
Olmaota shahar politsiya boshqarmasi ma’lumotiga ko‘ra, deportatsiya jarayoni qonuniy tartibda va barcha xavfsizlik talablari asosida tashkil etilgan. Xususan, fuqarolar hujjatlashtirilgan holda maxsus rejalashtirilgan transport vositasida Qozog‘iston–O‘zbekiston chegarasiga olib borilgan.
