Vizasiz rejim: O‘zbekiston va Tailand o‘rtasida safarlar bo‘yicha kelishuvga erishildi
Hozir hujjat matni Tailand tomonidan ko‘rib chiqilmoqda.
O‘zbekiston va Tailand o‘rtasida vizasiz safarlar to‘g‘risidagi bitimni imzolash bo‘yicha kelishuvga erishildi. Hozirda hujjat matni Tailand tomonidan ko‘rib chiqilmoqda. Bu haqda O‘zbekiston Tashqi ishlar vazirligi ma’lum qildi.
Avvalroq ijtimoiy tarmoqlarda Tailand hukumati 2026-yil 15-sentabrdan boshlab O‘zbekiston fuqarolari, jumladan, sayyohlar uchun elektron viza rasmiylashtirish tartibini bekor qilishi mumkinligi haqida xabarlar tarqalgan edi.
TIV ma’lumotiga ko‘ra, joriy yilning may oyidan boshlab O‘zbekiston fuqarolarining Tailandga safar qilishlari uchun qulay sharoit yaratish maqsadida diplomatik muzokaralar olib borilmoqda.
Xususan, Tailand Tashqi ishlar vazirligi bilan o‘tkazilgan to‘g‘ridan to‘g‘ri muzokaralar davomida vizasiz safarlar to‘g‘risidagi bitimni imzolash bo‘yicha kelishuvga erishilgan.
Shu bilan birga, o‘zbekistonliklarning Tailand elektron vizasini rasmiylashtirishda duch kelayotgan muammolarini hal etish yuzasidan ham ishlar olib borilmoqda.
Bu yo‘nalishda O‘zbekistonning Tailanddagi Bosh konsulxonasi Tailand Tashqi ishlar vazirligi hamda Turizm va sport vazirligi bilan muntazam uchrashuvlar o‘tkazmoqda. O‘zbekistonning Rossiyadagi elchixonasi ham Tailandning Moskvadagi diplomatik vakolatxonasi bilan hamkorlik qilmoqda.
