Bir daqiqaga sizning o‘rningizda bo‘lib tursam maylimi — hokimga noodatiy taklif
Olmaliqda “Yoshlar kuni” munosabati bilan o‘tkazilgan uchrashuvda maktab o‘quvchisi bir daqiqaga hokimlik lavozimini bajarib ko‘rish istagini bildirdi.
Toshkent viloyatining Olmaliq shahrida “Yoshlar kuni” munosabati bilan tashkil etilgan uchrashuv davomida yoshlar va shahar hokimi o‘rtasida ochiq muloqot bo‘lib o‘tdi. Tadbirda yoshlar o‘z taklif va muammolari yuzasidan fikr-mulohazalarini bildirdi.
Uchrashuv jarayonida maktab o‘quvchilaridan biri — o‘zini Olmaliq shahrining iqtidorli yoshlaridan biri sifatida tanishtirgan o‘quvchi — bir daqiqaga hokimlik lavozimini bajarib ko‘rish istagini bildirgan. U o‘z murojaatida: “Bugun 300 ta orzu va maqsad haqida gap ketdi. Ana shu 300 ta orzudan bittasini amalga oshirsak bo‘ladimi? Bir daqiqaga sizning o‘rningizda bo‘lib tursam maylimi?” — deya shahar hokimidan so‘ragan.
Olmaliq shahar hokimi Qobil Hamdamov mazkur taklifni ijobiy qabul qilib, o‘quvchiga qisqa muddatga rahbarlik qilish uchun imkoniyat yaratib berdi.
