Yaponiyada odamlar bilan gaplashadigan “diniy” robot yaratildi

 

Kioto universiteti tadqiqot guruhi Teraverse va XNOVA bilan hamkorlikda odamlar bilan muloqot qilish va o‘zaro aloqa o‘rnatishga mo‘ljallangan sun’iy intellekt asosidagi buddist gumanoid robotni ishlab chiqdi. Bu haqda TASS nashri xabar berdi.

 

Buddharoid deb nomlangan mazkur robot Unitree Robotics tomonidan ishlab chiqarilgan Unitree G1 platformasi asosida yaratilgan bo‘lib, BuddhaBot-Plus tizimi bilan jihozlangan.

 

Ishlab chiquvchilarning ma’lum qilishicha, robotning dialog moduli OpenAI tomonidan yaratilgan ChatGPT’ning eng so‘nggi versiyasidan foydalanadi. Javoblar dastlab buddist diniy matnlaridan olingan formulalar asosida shakllantiriladi, so‘ngra keng ko‘lamli til modeli yordamida izoh va talqinlar bilan boyitiladi. Bu esa robotga diniy-falsafiy savollarga mazmunli va izchil javob berish imkonini yaratadi.

 

Loyiha doirasida gumanoid robotga bir qator tabiiy imo-ishoralar o‘rgatilgan. Xususan, u mustaqil ravishda yurishi, ta’zim qilishi hamda qo‘llarini birlashtirgan holda hurmat ifodalashi mumkin. Tizim nutqni aniqlash va sintez qilish funksiyalariga ega bo‘lib, og‘zaki javoblarni tana harakatlari bilan sinxronlashtirish imkonini beradi.

 

Ishlab chiquvchilarning ta’kidlashicha, Buddharoid ikki oyoqda erkin harakatlana oladigan va tabiiy og‘zaki muloqotga qodir bo‘lgan ilk “diniy sun’iy intellekt roboti” hisoblanadi. Mazkur loyiha diniy-ma’rifiy sohada innovatsion yechim sifatida baholanmoqda.

 

Shuningdek, mutaxassislar ushbu texnologiyani boshqa yo‘nalishlarda ham qo‘llash mumkinligini bildirgan. Jumladan, konsalting xizmatlari, tahliliy vazifalar hamda iqtisodiy nazariya bo‘yicha o‘qitilgan gumanoid sun’iy intellekt tizimlarini yaratish rejalashtirilmoqda.