Eron rasman Jahon chempionatini tark etdi
Hukumat sportchilarning Jahon chempionatiga borish xavfini o‘z zimmasiga olmasligini bildirdi.
Eron rasman futbol bo‘yicha Jahon chempionatidan chiqishini eʼlon qildi. Bu qaror mamlakatdagi so‘nggi keskin siyosiy voqealar ortidan qabul qilingan.
Ayni vaqtga qadar Oliy rahbar Oyatulloh Ali Homanaiy va mamlakatning bir qator yuqori darajali amaldorlari AQSH va Isroil hujumi natijasida halok bo‘lgani xabar qilingan edi. Bu voqealar Erondagi ichki siyosiy muhitni jiddiy izdan chiqarib, xalqaro sport tadbirlarida ishtirok qilish imkoniyatlarini ham chekladi.
Maʼlumot uchun, Eron terma jamoasi “G” guruhidan o‘rin olgan bo‘lib, barcha guruh bosqich uchrashuvlari AQSHda bo‘lib o‘tadi.
“Eron hayotni futbol bilan taqqoslab bo‘lmaydi, deb hisoblaydi va o‘z futbolchilarining Jahon chempionatiga borishi xavfini o‘z zimmasiga olmaydi”, - deyiladi bayonotda.
Tahlilchilar fikricha, Eronning Jahon chempionatidan chiqishi nafaqat sport sohasidagi natijalarga taʼsir qiladi, balki xalqaro maydonda mamlakatning siyosiy izolyatsiyasi va xavfsizlik vaziyatini ham ko‘rsatadi.
