Erondagi O‘zbekiston terma jamoasi futbolchilarining ahvoli qanday?
Maʼlumotlarga ko‘ra, ular notinch vaziyat sababli Eronni vaqtincha tark etyapti.
AQSH va Isroil tomonidan Eron hududiga berilgan havo zarbalari ortidan ushbu mamlakatda to‘p surayotgan o‘zbekistonlik futbolchilar xavfsizlik nuqtayi nazaridan Eronni vaqtincha tark etmoqda. Bu haqida “Daryo” nashri xabar berdi.
Qayd etilishicha, Eron klublari sharafini himoya qilayotgan O‘zbekiston milliy terma jamoasining bir necha aʼzosi notinch vaziyat sababli xavfsiz hududlarga yo‘l olgan.
Ular quyidagilar:
- Rustam Ashurmatov (“Istiqlol”) — ayni damda Dubayda bo‘lib turibdi.
- Odil Hamrobekov (“Traktorsozi”) — Toshkentga qaytishga ulgurdi.
- Jaloliddin Masharipov (“Istiqlol”) — jarohatidan tiklanish jarayonini o‘tash uchun Italiyaga yo‘l olgan.
- Igor Sergeyev («Persepolis») — 28 fevral kuni Eron chegarasidan o‘tish uchun yo‘lga chiqqan.
- Oston O‘runov («Persepolis») — ayni daqiqalarda Eron chegarasi orqali Turkiya davlatiga o‘tmoqda.
28 fevral kuni mahalliy vaqt bilan soat 09:30 atrofida Tehron va mamlakatning boshqa yirik shaharlari raketa hujumiga uchragandi. Hujumlar oqibatida mamlakatning 24 ta viloyatida jami 201 kishi halok bo‘lgan, 747 kishi esa turli darajada jarohat olgan.
