Oʻzbekiston Prezidenti Kuvayt va Qatar yetakchilari bilan telefon orqali muloqot qildi
Muloqotda Yaqin Sharqdagi vaziyat keskinligi va hududdagi xavflar muhokama qilindi.
4-mart kuni Oʻzbekiston Prezidenti Shavkat Mirziyoyev Kuvayt Davlati Valiahdi Shayx Saboh al-Holid al-Hamad as-Saboh va Qatar Davlati Amiri Shayx Tamim bin Hamad Ol Soniy bilan telefon orqali muloqot qildi.
Muloqot davomida Yaqin Sharq mintaqasidagi vaziyatning keskinlashuvi, hududdagi turli infratuzilma obyektlariga berilgan zarar va xavf omillari yuzasidan jiddiy tashvish bildirildi. Tomonlar xalqaro huquq tamoyillari doirasida tinchlikni saqlash va aholi osoyishtaligini ta’minlash zarurligini qayd etdilar.
Shavkat Mirziyoyev oʻz navbatida O‘zbekiston fuqarolarining xavfsizligi va ularni Vataniga qaytarish bo‘yicha amalga oshirilayotgan chora-tadbirlar uchun minnatdorlik bildirdi.
Tomonlar shuningdek, ikki tomonlama strategik sheriklik va do‘stona munosabatlarni mustahkamlashga oid masalalarni ham muhokama qildilar.
Kuvayt va Qatar yetakchilari o‘z navbatida, sinovli kunlarda bildirgan samimiy qo‘llab-quvvatlaganlik va birdamlik so‘zlari uchun Oʻzbekiston Prezidentiga minnatdorliklarini izhor etdilar.
