O‘zbekiston va Ozarbayjon rahbarlari telefon orqali muloqot qildi
Prezident Shavkat Mirziyoyev Ozarbayjonga uchuvchisiz dron hujumlarini qoraladi.
O‘zbekiston Prezidenti Shavkat Mirziyoyev 5-mart kuni Ozarbayjon Prezidenti Ilhom Aliyev bilan telefon orqali muloqot qildi.
Suhbat avvalida davlat rahbari Ozarbayjon hududiga uchuvchisiz uchish apparatlari bilan uyushtirilgan hujumlarni keskin qoralab, jarohat olganlarning tez fursatda sog‘ayib ketishini tiladi.
So‘nggi kunlarda Yaqin Sharq mintaqasida kuzatilayotgan keskinlikning avj olishi ko‘plab tinch aholining qurbon bo‘lishiga olib kelayotgani va jiddiy xavotir uyg‘otayotgani alohida qayd etildi.
Muborak Ramazon oyida ro‘y berayotgan bunday voqealar umuminsoniy qadriyatlarga, xalqaro normalar va davlatlarning hududiy yaxlitligi tamoyillariga zid ekani ta’kidlandi.
O‘zbekiston yetakchisi o'zbekistonliklarni Erondan Ozarbayjon hududi orqali xavfsiz evakuatsiya qilish bo‘yicha ko‘rilayotgan choralar va yaratilayotgan sharoitlar uchun Ilhom Aliyevga minnatdorlik bildirdi.
Ozarbayjon Prezidenti, o‘z navbatida, O‘zbekiston rahbariga do‘stona suhbat va sinovli damlarda ko‘rsatilgan qo‘llab-quvvatlov uchun alohida tashakkur izhor etdi.
