O‘zbekiston va Ozarbayjon TIV rahbarlari Naxchivondagi dron hujumi masalasini muhokama qildi
O‘zbekiston tomoni mazkur hujum yuzasidan jiddiy xavotir bildirib, xalqaro huquq tamoyillariga rioya qilish zarurligini ta’kidladi.
Baxtiyor Saidov va Jeyhun Bayramov o‘rtasida telefon orqali muloqot bo‘lib o‘tdi. Suhbat davomida Ozarbayjonning Naxchivon Avtonom Respublikasi hududida sodir bo‘lgan uchuvchisiz uchish apparati hujumi bilan bog‘liq vaziyat muhokama qilindi.
Ma’lum qilinishicha, ozarbayjonlik vazir hamkasbiga mazkur hududga qilingan dron hujumi tafsilotlari haqida ma’lumot bergan. Hujum oqibatida tinch aholi jabr ko'rgani hamda fuqarolik infratuzilmasiga zarar yetgani ta’kidlangan.
O‘zbekiston tomoni mazkur hodisa yuzasidan jiddiy xavotir bildirgan. Bu haqda vazir Baxtiyor Saidovning Telegram kanalida e’lon qilingan bayonotda ma’lum qilindi.
Unda qayd etilishicha, O‘zbekiston tomoni xalqaro huquq tamoyillariga zid bo‘lgan, boshqa davlatning suvereniteti va hududiy yaxlitligini buzishga qaratilgan harakatlarni qabul qilib bo‘lmasligini ta’kidlagan.
