Erondan O‘zbekistonga kislotali bulutlar kelishi haqidagi xabarlar rad etildi

Ijtimoiy tarmoqlarda Erondan O‘zbekiston hamda Markaziy Osiyoning boshqa davlatlariga kislotali bulutlar yetib kelishi mumkinligi haqida turli xabarlar tarqaldi. “O‘zgidromet” ushbu ma’lumotlar ilmiy jihatdan asoslanmaganini ma’lum qilib, bunday xavf mavjud emasligini bildirdi.

 

Qayd etilishicha, kislotali yog‘inlar atmosferada oltingugurt oksidlari (SO₂) va azot oksidlari (NO₂) uzoq vaqt davomida to‘planib, bulutlarda suv bug‘i bilan kimyoviy reaksiyaga kirishishi natijasida hosil bo‘ladi. Bunday jarayonlar, asosan, yirik sanoat hududlari va kuchli chiqindi manbalari yaqinida kuzatiladi.

 

Mutaxassislarning ta’kidlashicha, havo massalari uzoq masofalarga ko‘chishi jarayonida ifloslantiruvchi moddalar konsentratsiyasi keskin kamayadi. Bunga atmosferadagi turbulentlik, vertikal aralashish hamda quruq va nam cho‘kish jarayonlari sabab bo‘ladi. Shu bois manbadan minglab kilometr uzoqlikda xavfli darajadagi kislotali yog‘inlar hosil bo‘lishi deyarli mumkin emas.

 

Shuningdek, yog‘inlarning hosil bo‘lishi asosan mahalliy bulut shakllanish jarayonlari bilan bog‘liq. Ya’ni yog‘inlar hudud ustidagi atmosferada mavjud bo‘lgan suv bug‘i va aerozollar hisobiga yuzaga keladi.

 

“O‘zgidromet”ning meteorologik kuzatuvlari hamda atmosfera havosi sifati monitoringi ma’lumotlariga ko‘ra, kislotali bulutlarning O‘zbekiston yoki qo‘shni davlatlar hududiga ko‘chib kelishi xavfi kuzatilmayapti.

 

Shu munosabat bilan mutaxassislar ommaviy axborot vositalari va ijtimoiy tarmoqlar foydalanuvchilarini tasdiqlanmagan ma’lumotlarni tarqatmaslikka hamda faqat rasmiy manbalarga tayanishga chaqirdi. Shuningdek, yolg‘on yoki tekshirilmagan axborotlarni tarqatish amaldagi qonunchilikka muvofiq javobgarlikka sabab bo‘lishi mumkinligi eslatildi.