Toshkentda o‘quvchilar kanaldan ko‘prik yo‘qligi sababli quvurlar orqali o‘tishga majbur bo‘lmoqda
Hokimlik Salar kanali ustida yangi ko‘prik qurilishi yaqin kunlarda boshlanishini ma’lum qildi.
Ijtimoiy tarmoqlarda Toshkent shahrining Sergeli tumanida maktab o‘quvchilari xavfsiz ko‘prik yo‘qligi sababli kanaldan quvurlar orqali o‘tayotgani aks etgan videolar tarqaldi.
Ma’lumotlarga ko‘ra, holat Jo‘nariq mahallasi hududida kuzatilgan. U yerda birinchi sinf o‘quvchilari hamda boshqa maktab o‘quvchilari maktabga borish uchun tor suv yo‘li ustiga o‘rnatilgan quvurlardan foydalanishga majbur bo‘layotgani aytilmoqda. Bu esa bolalarning har kuni o‘z hayotini xavf ostiga qo‘yib yo‘l bosishiga sabab bo‘lmoqda.
Holat yuzasidan Sergeli tuman hokimligi rasmiy munosabat bildirdi. Idora ma’lumotiga ko‘ra, video Yuqori Darxon mahallasi va Jo‘nariq mahallalari tutashgan hududda olingan.
Qayd etilishicha, Salar kanali ustidan o‘tuvchi ko‘prikni qayta qurish bo‘yicha Toshkent shahar hokimining tegishli qarorlari qabul qilingan.
Ma’lum qilinishicha, qurilish ishlari yaqin 5–10 kun ichida boshlanishi rejalashtirilgan. Loyiha doirasida yangi ko‘prik qurish, piyodalar uchun alohida yo‘laklar tashkil etish hamda yo‘l qoplamasini ta’mirlash ishlari amalga oshiriladi.
