Yaqin Sharqdan 25 mingdan ortiq o‘zbekistonlik vataniga qaytarildi
Qaytarilganlarning asosiy qismi Saudiya Arabistoni va BAAdan olib kelingan.
10-mart kuni ertalab holatiga ko‘ra, Yaqin Sharq mamlakatlaridan O‘zbekistonga qaytarilgan fuqarolar soni 25 047 nafarga yetdi. Bu haqda O‘zbekiston Respublikasi Tashqi ishlar vazirligi matbuot xizmati ma’lum qildi.
Ma’lum qilinishicha, vatandoshlarni evakuatsiya qilish ishlari tizimli va bosqichma-bosqich amalga oshirilmoqda hamda mintaqadagi olti davlatni qamrab olmoqda.
Qaytarilgan fuqarolarning asosiy qismi Saudiya Arabistonidan bo‘lib, ushbu mamlakatdan 21 mingdan ortiq o‘zbekistonlik vataniga olib kelindi. Shuningdek, Birlashgan Arab Amirliklaridan 3500 dan ortiq fuqaro O‘zbekistonga qaytarilgan.
Bundan tashqari, Qatar, Eron, Bahrayn va Ummon hududlaridan ham o‘zbekistonliklarni olib kelish bo‘yicha maxsus reyslar tashkil etildi.
Tashqi ishlar vazirligi evakuatsiya ishlari, asosan, fuqaro aviatsiyasi uchun havo hududi ochiq bo‘lgan davlatlar orqali amalga oshirilayotganini ta’kidladi.
