Turkiyada o‘ldirilgan samarqandlik ayolning jasadi O‘zbekistonga olib kelindi

 

Turkiyada o‘ldirilgan, asli samarqandlik 46 yoshli Dilafruz Chulliyevaning jasadi O‘zbekistonga qaytarildi. Bu haqda Istanbul bosh konsulxonasi ma’lum qildi.

 

Ma’lum qilinishicha, marhumaning jasadi O‘zbekistonning Istanbul shahridagi Bosh konsulxonasi hamda Tashqi mehnat migratsiyasi agentligi ko‘magida O‘zbekistonga olib kelingan.

 

Dilafruz Chulliyeva 2026-yil 25-yanvar kuni Turkiyaning Balikesir hududidagi ish joyidan noma’lum tomonga chiqib ketgan va bedarak yo‘qolgan. Shundan so‘ng uning o‘g‘li O‘zbekiston Tashqi ishlar vazirligining Konsullik-huquqiy departamentiga murojaat qilgan.

 

Murojaatdan keyin O‘zbekistonning Turkiyadagi diplomatik vakolatxonalari Turkiya Tashqi ishlar vazirligiga nota yuborgan hamda Turkiya Ichki ishlar vazirligi Xavfsizlik bosh boshqarmasi bilan hamkorlikda qidiruv ishlari boshlangan.

 

Anqaradagi O‘zbekiston elchixonasi va Istanbuldagi Bosh konsulxona, diaspora vakillari, advokatlar hamda ijtimoiy tarmoq faollari tomonidan qidiruv ishlari olib borilgan. 2026-yil 28-fevral kuni Balikesir tumanidagi o‘rmon hududidan shaxsi noma’lum jasad topilgan.

 

 

Jasad uzoq vaqt davomida qolib ketgani sababli uni tashqi ko‘rinishidan aniqlash imkoni bo‘lmagan. Shu bois topilgan jasad hamda marhumaning o‘g‘lidan olingan qon namunalarini solishtirish orqali DNK tekshiruvi o‘tkazilgan va jasad Dilafruz Chulliyevaga tegishli ekani tasdiqlangan.

 

Mazkur jinoyatda gumonlanib 4 nafar shaxs qo‘lga olingan. Hozirda tergov harakatlari davom etmoqda.

 

Mutasaddilar ijtimoiy tarmoqlarda tasdiqlanmagan ma’lumotlarni tarqatmaslikni so‘rab, marhumaning yaqinlariga hamdardlik bildirdi.