Shavkat Mirziyoyev Qosim-Jo‘mart To‘qayevni tabrikladi
Qozog‘istondagi referendumda qariyb 90 foiz ovoz bilan yangi Konstitutsiya loyihasi ma’qullandi.
O‘zbekiston Respublikasi Prezidenti Shavkat Mirziyoyev 16-mart kuni Qozog‘iston Respublikasi Prezidenti Qosim-Jo‘mart Toqayev bilan telefon orqali muloqot qilib, yangi tahrirdagi Konstitutsiya loyihasi bo‘yicha referendum muvaffaqiyatli o‘tkazilgani bilan tabrikladi.
Ma’lumotlarga ko‘ra, yangi tahrirdagi Konstitutsiya 90 foiz ovoz bilan ma’qullangan.
Yevroosiyo integratsiyasi institutiga ko‘ra, yangi Konstitutsiyani qabul qilish uchun 86,7 foiz ovoz berilgan.
“Sotsis-A” instituti so‘rovida bu ko‘rsatkich 87,4 foizni tashkil etmoqda. Ijtimoiy siyosat institutining ekzitpol natijalari esa respondentlarning 88,6 foizi yangi Konstitutsiyani qo‘llab-quvvatlaganini ko‘rsatgan.
Shuningdek, To‘qayev yangi Konstitutsiya qabul qilingani bilan fuqarolarni tabrikladi. U referendum o‘tkazilgan 15-mart sanasini Konstitutsiya kuni deb e’lon qildi.
“Men ko‘plab mamlakatlarning Konstitutsiyalari bilan tanishdim va ishonch bilan ayta olamanki, asosiy qonunimiz eng yaxshilari qatorida turadi”, — dedi To‘qayev.
Qayd etilishicha, referendum kuni butun mamlakat bo‘ylab 10 388 ta saylov uchastkasi ochilgan. Qozog‘istonning 54 ta mamlakatdagi diplomatik vakolatxonalarida yana 71 ta saylov uchastkasi tashkil etilgan.
