Tramp jamoasi ichida kelishmovchilik yuzaga keldi — Bild
Eronga qarshi urush fonida AQSH vitse-prezidenti Jey Di Vens va Davlat kotibi Marko Rubio o‘rtasida ziddiyat paydo bo‘lgan.
AQSh prezidenti Donald Trampning jamoasi va tarafdorlari orasida ichki kelishmovchilik yuzaga keldi. Bu haqda Bild nashri manbalarga tayanib xabar bermoqda.
Noma’lum manbalarga ko‘ra, Tramp yaqinda o‘zining yirik homiylaridan kim uni voris sifatida eng yaxshi qo‘llab-quvvatlashi mumkinligini so‘ragan. Tramp voris sifatida AQSh vitse-prezidenti Jey Di Vens yoki Davlat kotibi Marko Rubioni nazarda tutgan.
Manbalarning ta’kidlashicha, homiylarning aksariyati deyarli bir ovozdan Davlat kotibini qo‘llab-quvvatlagan.
Biroq, MAGA (“Amerikani yana buyuk qil”) harakati tarafdorlari orasida Vens ko‘proq mashhur. Emerson kolleji so‘rovnoma markazi o‘tkazgan so‘nggi tadqiqot natijalariga ko‘ra, respublikachilar orasida Vensning qo‘llab-quvvatlash reytingi 52% ni tashkil qilib, Rubio atigi 20% bilan ortda qolmoqda.
“Bu vaziyat Tramp jamoasi ichidagi ichki ziddiyat va qarama-qarshi fikrlarni yana bir bor ochib qo‘ydi”, deb yozmoqda nashr.
