Islom sivilizatsiyasi markazi – Yevroosiyoning yangi geostrategik markazi — Forbes
Islom sivilizatsiyasi markazi O‘zbekistonning Yevroosiyo, Yaqin Sharq va Janubiy Osiyo o‘rtasidagi madaniy va diplomatik ko‘prik sifatidagi yangi rolining “ramziy va strategik tayanchi”ga aylanmoqda.
Toshkent shahridagi Islom sivilizatsiyasi markazining rasmiy ochilish kunida nufuzli xalqaro nashr Forbes tahliliy maqola e’lon qilib, unda O‘zbekiston loyihasini «Yevroosiyodagi yangi markaz» deb atadi hamda uning madaniy-diplomatik va geostrategik ahamiyatini ta’kidladi.
Maqola muallifi, taniqli geosiyosiy tahlilchi Kamran Boxari, Markaz tashkil etilishini O‘zbekistonda kechayotgan keng qamrovli o‘zgarishlar – mintaqaviy o‘yinchidan global xavfsizlik, iqtisodiyot va madaniy hamkorlik arxitekturasining faol ishtirokchisiga aylanish jarayonining bir qismi sifatida baholaydi. Nashrda qayd etilishicha: «Markaz Yevroosiyo makonida islomiy intellektual va madaniy an’analarni shakllantirishda O‘zbekistonning tarixiy o‘rnini namoyon etuvchi muhim tashabbusdir».
Forbes e’tiborni shu jihatga qaratadiki, global beqarorlik va «g‘oyalar raqobati» sharoitida Islom sivilizatsiyasi markazi nafaqat madaniy obyekt, balki madaniy kuchning strategik platformasiga aylanmoqda: «Markaz bag‘rikeng Markaziy Osiyo musulmon an’analari modelini namoyon etish va konstruktiv muloqot uchun muhim maydonga aylanish salohiyatiga ega».
Maqolada, shuningdek, O‘zbekiston Respublikasi Prezidenti Shavkat Mirziyoyev rahbarligida olib borilayotgan siyosatga alohida e’tibor qaratilgan bo‘lib, u islomning insonparvarlik mohiyatini ilgari surish, xalqaro hamkorlikni rivojlantirish va mintaqaga nisbatan yangi qiyofa shakllantirishga qaratilgani ta’kidlangan.
Muallif fikricha, Islom sivilizatsiyasi markazi O‘zbekistonning Yevroosiyo, Yaqin Sharq va Janubiy Osiyo o‘rtasidagi madaniy va diplomatik ko‘prik sifatidagi yangi rolining «ramziy va strategik tayanchi»ga aylanmoqda.
Nashrda yana ta’kidlanishicha, Markaz tashkil etilishi O‘zbekistonning tarixiy merosni zamonaviy ta’sir vositalari bilan uyg‘unlashtira oladigan davlat sifatidagi pozitsiyasini mustahkamlaydi.
«O‘zbekiston o‘z sivilizatsion merosini global barqarorlik va barqaror rivojlanishni qo‘llab-quvvatlovchi zamonaviy madaniy kuch vositasiga aylantirmoqda», — deyiladi materialda.
Forbes Markaz ochilishini faqat milliy voqea sifatida emas, balki kengroq geoiqtisodiy va geosiyosiy strategiyaning bir qismi sifatida baholaydi. Ushbu strategiya doirasida Toshkent Yevroosiyoning muhim tugunlaridan biri sifatida o‘z pozitsiyalarini mustahkamlamoqda.
Markaz ochilgan kuni e’lon qilingan mazkur maqola O‘zbekistonga bo‘lgan xalqaro qiziqish ortib borayotganini hamda uning madaniyat, ilm-fan va sivilizatsiyalar muloqoti orqali yangi global muvozanatni shakllantirishdagi o‘rni mustahkamlanib borayotganini tasdiqlaydi.
