Eron Ho‘rmuz bo‘g‘ozi uchun boj undirishni ko‘rib chiqmoqda
Ho‘rmuz bo‘g‘ozida kemalarining xavfsiz harakati ta’minlanishi uchun mamlakatlar boj to‘lashga majbur bo‘ladi.
Eron parlamenti vakili Somayah Rafaiy ma’lum qilishicha, qonun chiqaruvchilar Ho‘rmuz bo‘g‘ozi uchun boj undirish taklifini ko‘rib chiqmoqda. Bu haqda BBC xabar berdi.
Taklifga ko‘ra, agar Ho‘rmuz bo‘g‘ozi kemalarning xavfsiz o‘tish yo‘li, energiya tranziti va oziq-ovqat xavfsizligini ta’minlash uchun ishlatilsa, mamlakatlar Eronga boj va soliq to‘lashga majbur bo‘ladi.
ISNA axborot agentligining xabar berishicha, Rafaiy Tehronning Valiasr maydonida bo‘lib o‘tgan ommaviy yig‘ilishda Eronning “Ho‘rmuz bo‘g‘ozi xavfsizligini ta’minlash va milliy manfaatlarni himoya qilishdagi vakolati”ni ta’kidlagan.
“Biz dushmanlarimizni avvalgi qulayliklardan mahrum etdik, bu holatga chidashga ularning sabri yetmaydi. Xudo xohlasa, bu urush Eronning ishonchli va qat’iy g‘alabasi bilan yakunlanadi. Shundan so‘ng Ho‘rmuz bo‘g‘ozi orqali o‘tish dushmanlarimiz uchun qiyinchiliklar tug‘dirishda davom etadi,”— dedi Rafaiy.
Bu taklif mintaqadagi global tranzit va energiya yo‘llarini nazorat qilish bo‘yicha Eronning siyosiy strategiyasini aks ettiruvchi muhim chora sifatida baholanmoqda.
