Dunyo yetakchilari Shavkat Mirziyoyevni Navroʻz bilan qutladi
Qutlovlarda Yangi Oʻzbekistondagi islohotlar yuqori baholandi.
Bahor faslining kirib kelishi va tabiatning uygʻonishi bilan uygʻun ravishda nishonlanadigan qadimiy bayram — Navroʻzi olam munosabati bilan Shavkat Mirziyoyev nomiga xorijiy davlatlar va hukumatlar rahbarlari, nufuzli xalqaro tashkilotlar yetakchilari, shuningdek, siyosat va jamoat arboblaridan samimiy tabriklar kelmoqda.
Tabriknomalarda Oʻzbekistonning koʻp millatli xalqiga tinchlik-osoyishtalik, barqaror taraqqiyot, farovonlik va ravnaq tilaklari izhor etilgan. Navroʻzning insoniyat tarixidagi o‘rni, uning yangilanish, ezgulik va hamjihatlik timsoli ekani alohida taʼkidlangan.
Xorijiy yetakchilar oʻz tabriklarida Oʻzbekistonda amalga oshirilayotgan keng koʻlamli islohotlar, Yangi Oʻzbekistonni barpo etish yoʻlidagi saʼy-harakatlar, iqtisodiy rivojlanish surʼatlari hamda aholi turmush darajasini yaxshilashga qaratilgan tashabbuslarga yuqori baho bergan.
Shuningdek, mamlakatning ochiq va pragmatik tashqi siyosati, mintaqada yaxshi qoʻshnichilik, oʻzaro ishonch va hamkorlikni mustahkamlashga qaratilgan tashabbuslari xalqaro hamjamiyat tomonidan ijobiy eʼtirof etilayotgani qayd etilgan.
Navroʻz bayrami munosabati bilan Prezident nomiga qutlov yoʻllaganlar orasida Vladimir Putin, Si Szinpin, Solman bin Abdulaziz Al Soud, Mohammed bin Salman, Rejep Tayyip Erdog'an, Qosim-Jomart Toqayev, Sadir Japarov, Emomali Rahmon, Serdar Berdimuhamedov, Gurbanguli Berdimuhamedov, Ilhom Aliyev, Alexander Lukashenko hamda Shahboz Sharif kabi davlat rahbarlari bor.
Qutlovlarda Navroʻzning xalqlarni birlashtiruvchi, doʻstlik va hamkorlikni mustahkamlovchi muhim bayram ekani taʼkidlanib, Oʻzbekiston bilan ikki tomonlama aloqalarni yanada rivojlantirishga tayyorlik bildirilgan.
Jumladan, Rossiya Prezidenti Vladimir Putin o‘z tabrigida Rossiya va Oʻzbekiston o‘rtasidagi strategik sheriklik va ittifoqchilik munosabatlari bundan buyon ham ikki xalq farovonligi hamda Markaziy Osiyoda xavfsizlik va barqarorlikni mustahkamlash yo‘lida rivojlanib borishiga ishonch bildirgan.
Xitoy rahbari Si Szinpin esa o‘z murojaatida Xitoy va Oʻzbekiston o‘rtasidagi har tomonlama strategik sheriklik munosabatlari yangi bosqichga ko‘tarilayotganini taʼkidlab, ikki mamlakat o‘rtasidagi hamkorlikni yanada kengaytirishga tayyor ekanini qayd etgan.
Turkiya Prezidenti Rejep Tayyip Erdog‘an Navroʻzning xalqlar oʻrtasidagi doʻstlik va hamjihatlikni mustahkamlovchi qadimiy bayram ekanini qayd etib, qardosh xalqlar o‘rtasidagi aloqalar yanada rivojlanishiga tilak bildirgan.
Markaziy Osiyo davlatlari rahbarlari ham o‘z tabriklarida mintaqada yaxshi qo‘shnichilik, o‘zaro ishonch va strategik hamkorlikni mustahkamlash muhimligini alohida taʼkidlagan.
Shuningdek, bir qator xalqaro tashkilotlar rahbarlari ham Prezident nomiga qutlov yoʻllagan. Ular orasida Nurlan Yermekbayev, Kubanichbek Omuraliev hamda boshqa nufuzli tashkilotlar vakillari bor.
Bundan tashqari, turli mamlakatlar siyosiy va jamoat arboblari, diniy tashkilotlar vakillari ham Navroʻz munosabati bilan samimiy tabriklar yoʻllagan.
Prezident nomiga kelayotgan tabriklar davom etmoqda.
