O‘zbekiston milliy terma jamoasi Gabonni 3:1 hisobida mag‘lub etdi
O‘zbekiston terma jamoasi turnirdagi navbatdagi bahsni 30-mart kuni Venesuelaga qarshi o‘tkazadi.
Toshkentda O‘zbekiston, Gabon, Venesuela hamda Trinidad va Tobago terma jamoalari ishtirokidagi FIFA Series xalqaro turniriga start berildi.
Musobaqaning ilk turida O‘zbekiston milliy terma jamoasi Gabon terma jamoasiga qarshi maydonga tushdi.
“Bunyodkor” stadionida bo‘lib o‘tgan uchrashuv ikki jamoaning faol hujumlari bilan boshlandi. O‘yinning 6-daqiqasida Gabon futbolchisi Teddi Averlant hisobni ochdi.
14-daqiqada O‘zbekiston terma jamoasi sardori Eldor Shomurodov Aziz G‘aniyevning aniq uzatmasidan so‘ng hisobni tenglashtirdi. Birinchi bo‘lim yakuniga yaqin esa vakillarimiz yana bir gol urishga muvaffaq bo‘ldi. Otabek Shukurovning uzatmasidan keyin Oston O‘runov qulay vaziyatdan foydalanib, jamoasini oldinga olib chiqdi.
Ikkinchi bo‘lim ham murosasiz kurashlar ostida davom etdi. 59-daqiqada terma jamoa safida debyut qilgan Jahongir O‘rozov bosh bilan gol urib, hisobni yanada mustahkamladi. Uchrashuvning so‘nggi daqiqalarida, 90+3-daqiqada Alisher Odilov yana bir gol muallifiga aylandi.
Shu tariqa O‘zbekiston milliy terma jamoasi uchrashuvni 3:1 hisobida o‘z foydasiga hal qilib, xalqaro turnirni ishonchli g‘alaba bilan boshladi.
Ma’lumot uchun, guruhdagi yana bir uchrashuvda Venesuela terma jamoasi Trinidad va Tobago ustidan 4:1 hisobida g‘alaba qozondi.
O‘zbekiston milliy terma jamoasi navbatdagi bahsni 30-mart kuni Venesuela terma jamoasiga qarshi o‘tkazadi. Uchrashuv Toshkent shahridagi “Bunyodkor” stadionida bo‘lib o‘tadi va soat 19:00 da boshlanishi rejalashtirilgan.
