Samarqandda maktab direktori o'rinbosari 9-sinf o'quvchisini kaltakladi
Ayni vaqtda holat huquqni muhofaza qiluvchi organlar tomonidan o‘rganilmoqda.
Samarqand viloyatining Urgut tumanidagi umumta’lim maktablaridan birida sodir bo‘lgan jismoniy zo‘ravonlik holati yuzasidan tekshiruv boshlandi. Bu haqda viloyat maktabgacha va maktab ta’limi boshqarmasi ma’lum qildi.
Ma’lumotlarga ko‘ra, 2-aprel kuni Urgut tumanidagi 2-sonli maktabda direktor o‘rinbosari tomonidan 9-sinf o‘quvchisiga nisbatan jismoniy kuch ishlatilgani aks etgan videolavha ijtimoiy tarmoqlarda tarqalgan. Tasvirlarda o‘smir bilan yuzaga kelgan mojaro kattalar tomonidan kuch ishlatilishi bilan yakunlangani ko‘rinadi.
Holat yuzasidan viloyat maktabgacha va maktab ta’limi boshqarmasi bolalarga nisbatan har qanday jismoniy zo‘ravonlikni qat’iyan qoralashini bildirib, vaziyatni o‘rganish uchun maxsus ishchi guruh tuzilganini ma’lum qildi.
Shuningdek, huquqni muhofaza qiluvchi organlar tomonidan ham mazkur holat bo‘yicha tergov harakatlari olib borilmoqda. Mutasaddilar voqea yuzasidan barcha holatlar o‘rganilib, tekshiruv natijalari bo‘yicha jamoatchilikka qo‘shimcha ma’lumot berilishini ma'lum qildi.
