Navoiydagi xususiy bog‘chada bolalarga zo‘ravonlik qilgan tarbiyachi qamoqqa olindi
Gumonlanuvchi o‘z qaramog‘idagi bolalarni muntazam kaltaklab kelgani aniqlandi.
Navoiy shahridagi xususiy maktabgacha ta’lim muassasasida bolalarga nisbatan qo‘pol munosabatda bo‘lgan tarbiyachiga jinoyat ishi qo‘zg‘atildi. Bu haqda viloyat Ichki ishlar boshqarmasi xabar berdi.
Ma’lum qilinishicha, Navoiy shahridagi xususiy bog‘cha tarbiyachisi bolalarni qiynab, do‘pposlaganlik holati aks etgan videoxabarlar tarqalgach, holat yuzasidan Navoiy viloyati Ichki ishlar boshqarmasi tomonidan tezkor-surishtiruv ishlari olib borilgan.
Voqea joriy yilning 7-aprel kuni Navoiy shahri “Yangiariq” MFY hududida joylashgan, fuqaro S.S. rahbarligidagi xususiy bog‘chada sodir bo‘lgani aniqlangan.
Dastlabki ma’lumotlarga ko‘ra, mazkur muassasada tarbiyachi bo‘lib ishlagan 2003-yilda tug‘ilgan E.N. o‘z qaramog‘idagi bolalarni “tartibga solish” bahonasida kaltaklagan.
Shuningdek, o‘rganishlar davomida gumonlanuvchi tomonidan joriy yilning mart oyidan aprel oyiga qadar bo‘lgan vaqt oralig‘ida bolalarni o‘zini-o‘zi himoya qilish imkoniyati cheklanganligi va ojiz ahvolda ekanligidan foydalanib, do‘pposlash va zo‘rlik ishlatib sodir etiladigan boshqa harakatlar bilan muttasil ravishda qiynab kelganligi ma’lum bo‘lgan.
Mazkur holat yuzasidan E.N.ga nisbatan Navoiy shahar IIB huzuridagi Tergov bo‘limi tomonidan O‘zbekiston Respublikasi Jinoyat kodeksining 110-moddasi 2-qismi bilan jinoyat ishi qo‘zg‘atilgan va fuqaro gumonlanuvchi tariqasida protsessual tartibda ushlangan.
Hozirda dastlabki tergov harakatlari olib borilmoqda.
