Toshkentdagi musiqa va san'at maktabiga Farrux Zokirov nomi beriladi
Maktabda “Yalla” nomidagi bolalar ansambli tashkil etiladi.
Shavkat Mirziyoyev tomonidan Farrux Zokirov ijodini keng targ‘ib qilish va uning merosini yosh avlodga yetkazishga qaratilgan farmon imzolandi. Bu haqda Adliya vazirligi xabar berdi.
Mazkur qarorga muvofiq, Toshkent shahrining Yashnobod tumanida joylashgan 7-son bolalar musiqa va san’at maktabiga Farrux Zokirov nomi beriladi.
Qarorga ko‘ra, mazkur ta’lim muassasasida “Yalla” nomidagi bolalar ansambli faoliyati yo‘lga qo‘yiladi. Shuningdek, yoshlar ijodiy laboratoriyasi tashkil etilib, “ustoz-shogird” an’analari asosida estrada yo‘nalishida ijrochilik mahorat maktablari faoliyati yo‘lga qo‘yiladi.
Mahorat maktablarida faoliyat yurituvchi ustoz-ijodkorlar davlat budjeti hisobidan har oyda qo‘shimcha rag‘batlantirib boriladi.
Bundan tashqari, 2026/2027 o‘quv yilidan Qoraqalpog‘iston Respublikasi, viloyatlar va Toshkent shahridan 3 nafardan bolalar musiqa va sanʼat maktabining iqtidorli o‘quvchilaridan iborat guruh shakllantirilib boriladi hamda taʼtil davrida yozgi to‘garakka jalb etilib, estrada xonandaligi bo‘yicha maxsus bepul kurslarda o‘qitiladi.
Shu bilan birga, maktabda zamonaviy ovoz yozish va tasvirga olish studiyasi tashkil etilishi, o‘quvchilarning ijodiy ishlari televideniye hamda xalqaro onlayn platformalarda namoyish etilishi rejalashtirilgan.
