Surunkali bel og‘rig‘idan qutulish yo‘li topildi
Yurish bel og‘rig‘i xavfini kamaytiradi.
Norvegiya va Daniya olimlari o‘tkazgan yangi tadqiqotga ko‘ra, kuniga atigi 100 daqiqa yurish surunkali bel og‘rig‘i xavfini deyarli 25 foizga kamaytiradi.
Tadqiqot mualliflaridan biri Rayan Xaddaj bu tajribani muhim deya baholab, shunday deydi: “Yurish — bu arzon, oson va ommaga tatbiq etilishi mumkin bo‘lgan sog‘lom faoliyat. U bel og‘rig‘i bilan kurashishda samarali usul bo‘lishi mumkin”.
Tadqiqot davomida 20 yoshdan oshgan 11 mingdan ortiq ishtirokchining harakatlari tahlil qilingan. 2017–2019-yillarda ular yetti kun davomida maxsus akselerometr moslamalarini taqib yurishgan, so‘ngra 2021–2023-yillarda ularning sog‘lig‘i yana baholangan — ayniqsa bel og‘rig‘i bor-yo‘qligi so‘ralgan.
Ishtirokchilar yurish davomiyligiga ko‘ra to‘rt guruhga bo‘lindi:
- 78 daqiqadan kam yuruvchilar
- 78–100 daqiqa yuruvchilar
- 101–124 daqiqa yuruvchilar
- 125 daqiqadan ko‘p yuruvchilar
Natijalar shuni ko‘rsatdiki, yurish davomiyligi oshgani sayin bel og‘rig‘i xavfi kamayadi. Shuningdek, o‘rtacha va tez yurish surunkali og‘riqlarning oldini olishda sekin yurishga qaraganda samaraliroq ekanligi aniqlangan.
CNNning ta’kidlashicha, dunyo bo‘ylab hozirda 600 milliondan ortiq odam bel og‘rig‘idan aziyat chekmoqda. Jahon sog‘liqni saqlash tashkiloti prognozlariga ko‘ra, bu raqam 2050-yilga kelib 843 millionga yetadi.
