Yosh oilalar uchun ipoteka foizining bir qismini davlat qoplab beradi
“Yangi O‘zbekiston yoshlari — 2030” strategiyasi doirasida yoshlar uchun ipoteka, grant, amaliyot va salomatlik bo‘yicha yangi choralar belgilanmoqda.
Prezident matbuot xizmatining ma’lum qilishicha, “Yangi O‘zbekiston yoshlari — 2030” strategiyasi doirasida yosh oilalarni qo‘llab-quvvatlash bo‘yicha yangi imtiyozlar joriy etiladi.
Unga ko‘ra, ipoteka dasturi orqali yosh oilalarning kredit foiz xarajatlari yengillashtiriladi. Xususan, kredit stavkasining Markaziy bank asosiy stavkasidan yuqori bo‘lgan qismi davlat tomonidan qoplab beriladi.
Strategiyada yoshlar uchun boshqa qo‘shimcha imkoniyatlar ham nazarda tutilgan. Jumladan, volontyorlik jamg‘armasi orqali 100 million so‘mgacha grantlar ajratiladi, faol yoshlar davlat idoralarida pullik amaliyotga jalb qilinadi, ilg‘or ijodkorlar uchun Prezident mukofoti ta’sis etiladi.
Shuningdek, kitob va Book-kafelar joylashgan “Yoshlar ko‘chalari” tashkil etiladi hamda hududlarda yoshlar infratuzilmasining minimal standartlari joriy qilinadi.
Strategiyada yoshlar salomatligini mustahkamlash ham muhim yo‘nalish sifatida belgilangan. Ruhiy xavf guruhidagi yoshlar ulushini 40 foizga kamaytirish, 24 soat ishlovchi psixologik aloqa markazini tashkil etish va sport bilan shug‘ullanuvchi yoshlar sonini 25 foizga oshirish rejalashtirilgan.
Bundan tashqari, har payshanba kuni yoshlar bilan ochiq muloqotlar o‘tkazib boriladi.
