Yoz mavsumi odatiy iqlim sharoitida kechishi kutilmoqda— O‘zgidromet

 

“O‘zgidromet” joriy yil yoz fasliga oid ijtimoiy tarmoqlarda tarqalgan keskin qurg‘oqchilik kelishi haqidagi xabarlar yuzasidan rasmiy munosabat bildirdi.

 

Ma’lum qilinishicha, 2026-yil yoz mavsumi Markaziy Osiyoga xos bo‘lgan odatiy iqlim sharoitida kechishi kutilmoqda. Iqlimiy modellarga ko‘ra, hududda harorat o‘zgarishlari ko‘p yillik me’yorlar doirasida saqlanib qoladi.

 

Shuningdek, yirik daryo va soylar havzalarida suv resurslarining shakllanishi 90–110 foiz oralig‘ida, ya’ni ko‘p yillik o‘rtacha ko‘rsatkichlarga yaqin bo‘lishi prognoz qilinmoqda.

 

Markaziy Osiyo davlatlararo suv xo‘jaligini muvofiqlashtiruvchi komissiyasi ma’lumotlariga ko‘ra, Amudaryo va Sirdaryo havzalarida 2026-yil uchun suv taqsimoti odatdagi me’yorlar asosida amalga oshirilmoqda.

 

Mutaxassislar, shuningdek, yoz mavsumida chang-to‘zonlar hudud uchun tabiiy va davriy hodisa ekanini, ularning anomal kuchayishi bo‘yicha ilmiy asoslar mavjud emasligini qayd etdi.

 

Orol dengizi qurigan tubida amalga oshirilayotgan keng ko‘lamli ko‘kalamzorlashtirish ishlari esa tuz va chang ko‘chishi intensivligini kamaytirishga xizmat qilayotgani ta’kidlandi.

 

Umuman olganda, 2026-yil yoz fasli mintaqaga xos bo‘lgan odatiy qurg‘oqchil davr sifatida prognoz qilinmoqda.