Prezident Shavkat Mirziyoyevning Qozog‘istonga amaliy tashrifi yakunlandi
Davlat rahbari tashrif doirasida Mintaqaviy ekologik sammit, OQXJ yig‘ilishi va bir qator uchrashuvlarda ishtirok etdi.
Bugun kunning birinchi yarmida davlat rahbari Mintaqaviy ekologik sammitning ochilish marosimida ishtirok etdi, “EXPO” xalqaro koʻrgazmalar markaziga tashrif buyurib, Oʻzbekiston va boshqa mamlakatlarning milliy pavilyonlari bilan tanishdi hamda BMTning Atrof-muhit dasturi ijrochi direktori Inger Andersen bilan uchrashdi.
Shu kunning oʻzida Oʻzbekiston yetakchisi Orolni qutqarish xalqaro jamgʻarmasi taʼsischi davlatlari rahbarlari kengashining yigʻilishida nutq soʻzladi.
Tadbirlar yakunlangach, Prezident Toshkentga joʻnab ketdi. Ostona xalqaro aeroportida Oʻzbekiston rahbarini Qozogʻiston Respublikasi Bosh vazirining oʻrinbosari – milliy iqtisodiyot vaziri Serik Jumangarin va boshqa rasmiy shaxslar kuzatib qoʻydi.
