Toshkent 2027-yilgi para yengil atletika bo'yicha Jahon chempionatiga mezbonlik qiladi
Musobaqada 100 dan ortiq davlatdan qariyb 1 300 nafar sportchi qatnashishi kutilmoqda.
Toshkent shahri para yengil atletika bo‘yicha kattalar o‘rtasidagi 2027-yilgi Jahon chempionatiga mezbon sifatida rasman tasdiqlandi. Bu haqda O‘zbekiston Milliy Paralimpiya qo‘mitasi xabar berdi.
Qayd etilishicha, mazkur nufuzli sport anjumani O‘zbekiston tarixida ilk bor, shuningdek, butun Markaziy Osiyo mintaqasida ham birinchi marta o‘tkaziladi.
Jahon chempionati 2027-yil iyun oyida poytaxtdagi Olimpiya shaharchasi hududida joylashgan Olimpiya stadionida bo‘lib o‘tishi rejalashtirilgan.
Musobaqa tartib bo‘yicha para yengil atletika bo‘yicha XIII Jahon chempionati hisoblanadi. Shu bilan birga, u Osiyo qit’asida beshinchi bor tashkil etilmoqda. Avval ushbu turnirga Doha (2015), Dubay (2019), Kobe (2024) hamda Nyu Deli (2025) mezbonlik qilgan.
Musobaqada 100 dan ortiq davlatdan qariyb 1 300 nafar sportchi qatnashishi kutilmoqda. Dastur Paralimpiya o‘yinlari formatiga mos ravishda shakllantiriladi.
