Oʻzbekistonda hayvonlar kasalliklari bo‘yicha yangi karantin qoidalari tasdiqlandi
Endilikda chorvachilikda kasallik tarqalishiga qarab karantin hududlari belgilanadi.
Oʻzbekistonda hayvonlarning yuqumli kasalliklari tarqalishining oldini olish maqsadida yangi karantin qoidalari tasdiqlandi. Vazirlar Mahkamasining tegishli qarori bilan infeksion kasalliklar yuzaga kelgan holatlarda cheklov choralarini joriy etish tartibi rasman belgilandi.
Yangi tartibga ko‘ra, karantin hududlari kasallikning og‘irlik darajasi, tarqalish xavfi hamda qo'zg'atuvchi omillarning biologik xususiyatlaridan kelib chiqib belgilanadi. Kasallik aniqlangan joylarda veterinariya-sanitariya tadbirlari amalga oshiriladi.
Shuningdek, profilaktik tadbirlarga alohida e’tibor qaratilib, davlat chegarasi orqali olib kirilayotgan hayvonlar uchun maxsus karantin maskanlari tashkil etiladi.
Mazkur qoidalar tashkiliy-huquqiy shaklidan qat'i nazar, O'zbekiston Respublikasi hududida barcha turdagi hayvonlarni boqish va hayvonlardan olingan mahsulotlarni qayta ishlash bilan shug'ullanadigan jismoniy va yuridik shaxslarga nisbatan qo'llaniladi.
Karantin talablariga rioya etilishi Qishloq xo‘jaligi vazirligi huzuridagi Veterinariya va chorvachilikni rivojlantirish qo‘mitasi hamda uning hududiy bo‘linmalari tomonidan nazorat qilinadi.
Bundan tashqari, karantin choralarini talab qiluvchi xavfli yuqumli kasalliklar ro‘yxati ham tasdiqlandi.
