O‘zbekiston va OTB o‘rtasidagi umumiy loyiha portfeli 16 mlrd dollarga yetdi

O‘zbekiston Prezidenti Shavkat Mirziyoyev Samarqand shahriga tashrifi doirasida Osiyo taraqqiyot banki prezidenti Masato Kanda boshchiligidagi delegatsiyani qabul qildi.

 

Uchrashuv avvalida bank rahbari O‘zbekistonda OTB Boshqaruvchilar kengashining 59-yillik yig‘ilishini o‘tkazishga ko‘rsatilgan yuksak darajadagi qo‘llab-quvvatlash va tashkiliy yordam uchun davlat rahbariga samimiy minnatdorlik bildirdi.

 

Muzokaralar chog‘ida O‘zbekiston va Osiyo taraqqiyot banki o‘rtasidagi o‘zaro manfaatli hamkorlikni yanada kengaytirishning ustuvor yo‘nalishlari muhokama qilindi.

So‘nggi yillarda hamkorlik sifat jihatidan yangi bosqichga ko‘tarilgani alohida ta’kidlandi.

O‘tgan davr mobaynida OTB mamlakatimizning ishonchli strategik sherigiga aylangani qayd etildi.

 

Bugungi kunda umumiy qiymati qariyb 16 milliard dollarga teng loyihalar portfeli shakllantirilgan bo‘lib, O‘zbekiston bankning mintaqadagi eng yirik hamkorlaridan biri hisoblanadi.

 

Hamkorlik doirasida transport infratuzilmasini rivojlantirish, energetika tizimini modernizatsiya qilish, ijtimoiy sohani qo‘llab-quvvatlash, suv ta’minoti va kanalizatsiya tarmoqlarini yangilash, qishloq xo‘jaligi hamda xususiy sektorni rivojlantirishga qaratilgan qator yirik loyihalar amalga oshirilmoqda.

 

Tomonlar 2030-yilgacha mo‘ljallangan yangi sheriklik dasturi doirasida umumiy qiymati 12,5 milliard dollarlik loyihalarni samarali va o‘z vaqtida amalga oshirish muhimligini qayd etdilar.

 

Shuningdek, ipoteka bozori, xususiy sektorni qo‘llab-quvvatlash, yoshlar va ayollar tadbirkorligini rivojlantirish, kambag‘allikni qisqartirish, inklyuziv ta’limni kengaytirish, inson kapitalini rivojlantirish hamda raqamli innovatsiyalarni joriy etish kabi ustuvor yo‘nalishlarda hamkorlikni kengaytirishga kelishib olindi.

 

Markaziy Osiyoda yirik infratuzilmaviy loyihalarni ilgari surish va investitsiyalarni safarbar etishda OTBning rolini yanada kuchaytirish zarurligi alohida ta’kidlandi.

 

Uchrashuv yakunida 2030-yilgacha mo‘ljallangan sheriklik dasturini almashish marosimi bo‘lib o‘tdi.