Meningokokk bo’yicha murojaatlar kelib tushmoqda — Sanepidqo’mita
Bemorlar bilan muloqotda bo‘lgan fuqarolar to‘liq emlash bilan qamrab olingan bo‘lib, ushbu shaxslar orasida kasallanish holatlari qayd etilmagan.
So‘nggi kunlarda aholi orasida meningokokk infeksiyasi bilan bog‘liq murojaatlar ko‘payib borayotgani munosabati bilan Sanitariya-epidemiologiya qo‘mitasi rasmiy bayonot bilan chiqdi.
Qayd etilishicha, ushbu infeksiya dunyoning ko‘plab mamlakatlarida bo‘lgani kabi O‘zbekistonda ham mavsumiy xarakterga ega bo‘lib, asosan kuz va bahor oylarida, xususan fevral–mart davrida ko‘proq uchraydi.
Hozirda respublikada epidemiologik vaziyat ustidan doimiy nazorat o‘rnatilgan. Barqarorlikni ta’minlash maqsadida keng qamrovli profilaktik hamda sanitariya-epidemiologik chora-tadbirlar izchil amalga oshirilmoqda.
Ma’lumotlarga ko‘ra, bemorlar bilan muloqotda bo‘lgan shaxslar to‘liq emlash bilan qamrab olingan va ular orasida kasallanish holatlari qayd etilmagan. Tibbiy qarshi ko‘rsatmasi mavjud fuqarolar esa shifokorlar nazorati ostida kimyoviy profilaktika bilan ta’minlanmoqda.
Mutaxassislar kasallikning asosiy alomatlari sifatida yuqori isitma, kuchli bosh og‘rig‘i, bo‘yinning qotishi, ko‘ngil aynishi, yorug‘likka sezgirlik, uyquchanlik, umumiy holsizlik, tutqanoq va ayrim holatlarda toshmalar paydo bo‘lishini ko‘rsatmoqda. Bolalarda esa tinmay yig‘lash, ovqatdan bosh tortish va keskin uyquchanlik yoki qo'zg'aluvchanlik, tanada qattiqlik kuzatilishi mumkin.
Fuqarolarga mazkur belgilar kuzatilganda darhol tibbiy muassasalarga murojaat qilish tavsiya etildi.
Kasallikning oldini olish uchun shaxsiy gigiyenaga rioya qilish, ommaviy joylarda ehtiyot choralarini ko‘rish, ''Haj'' va ''Umra'' safarlariga chiqishdan oldin emlanish, ixtiyoriy emlanishdan o'tish hamda shifokor tavsiyalariga amal qilish muhimligi ta’kidlandi.
Ayni paytda respublika bo‘ylab vaksinatsiya markazlarida yetarli miqdorda vaksinalar mavjud bo‘lib, aholini emlash uchun barcha sharoitlar yaratilgan.
Sanepidqo‘mita fuqarolarni ortiqcha xavotirga tushmaslikka, vaziyat barqarorligini inobatga olib, faqat rasmiy va ishonchli manbalarga tayanishga chaqirdi.
