OTM bitiruvchilaridan diplom himoya oldidan qo‘shimcha hujjatlar talab qilinyaptimi?

 

Ijtimoiy tarmoqlarda davlat oliy ta’lim muassasalari bitiruvchilaridan diplom himoyasi oldidan turli qo‘shimcha hujjatlar — o‘zini o‘zi band qilgani to‘g‘risida ma’lumot, rasmiy ish joyidan ma’lumotnoma yoki uch tomonlama shartnoma talab qilinayotgani haqidagi xabarlar yuzasidan rasmiy izoh berildi.

 

Oliy ta’lim, fan va innovatsiyalar vazirligi ma’lum qilishicha, amaldagi tartiblarga ko‘ra, bitiruvchilardan diplom berish yoki bitiruv malakaviy ishini himoya qilish jarayonida ularning ish bilan bandligiga oid qo‘shimcha hujjatlarni taqdim etish talab etilmaydi. Bitiruv malakaviy ishini himoyaga qo‘yish faqat o‘quv jarayoni bilan bog‘liq mezonlar asosida amalga oshiriladi.

 

Qayd etilishicha, bitiruvchilarning bandlik holatini tahlil qilish va ularning mehnat bozoriga kirib borishini kuzatish maqsadida bir qator davlat idoralari o‘rtasida axborot tizimlari integratsiya qilingan. Xususan, Soliq qo‘mitasi, Kambag‘allikni qisqartirish va bandlik vazirligi, Adliya vazirligi hamda Ijtimoiy himoya milliy agentligi o‘rtasida monitoring ishlari olib borilmoqda.

 

Mazkur jarayonlar raqamli platformalar orqali avtomatik tarzda amalga oshiriladi va talabalar zimmasiga qo‘shimcha hujjatlar taqdim etish majburiyatini yuklamaydi.

 

Vazirlik barcha oliy ta’lim tashkilotlariga bitiruvchilar bilan ishlashda qonunchilik talablariga qat’iy rioya qilish, ortiqcha byurokratik to‘siqlarga yo‘l qo‘ymaslik hamda ma’lumotlarni yig‘ishda ixtiyoriylik tamoyiliga amal qilish bo‘yicha ko‘rsatmalar berilganini bildirdi.