O‘zbekistonda ekologik qonunbuzarliklar uchun moliyaviy javobgarlik kuchaytiriladi
Suvni ifloslantirish va daraxtlarni himoya qilmaslik holatlarida katta miqdorda moliyaviy sanksiyalar qo‘llaniladi.
O‘zbekistonda ekologiya, atrof-muhitni muhofaza qilish va tabiiy resurslardan foydalanish sohasidagi qonunbuzarliklar uchun javobgarlik kuchaytirilmoqda. Bu borada Joriy yil 4-mayda qabul qilingan O‘RQ–1143-sonli Qonun bilan tegishli qonunchilik hujjatlariga o‘zgartirish va qo‘shimchalar kiritildi. Bu haqda Adliya vazirligi xabar berdi.
Yangi tartiblarga ko‘ra, ekologik, atrof-muhitni muhofaza qilish va tabiatdan foydalanish sohasidagi huquqbuzarliklar uchun moliyaviy sanksiyalar joriy etiladi.
Xususan, daryo o‘zanlarini tozalash va qirg‘oqlarini mustahkamlash bo‘yicha belgilangan tartiblarni buzganlik uchun yuridik shaxslarga atrof-muhitga yetkazilgan zararning 3 baravari miqdorida jarima qo‘llanadi.
Suvlarni ifloslantirish, shuningdek, suv obyektlariga oqova suvlarni tashlash talablari buzilganda, kompensatsiya to‘lovining 10 baravari miqdorida moliyaviy sanksiya belgilanadi.
Yuridik shaxslar tasarrufidagi hududlarda daraxtlarni muhofaza qilish va saqlash choralarini ko‘rmaganlik uchun yetkazilgan zararning 5 baravari miqdorida jarima undiriladi.
Qonun rasmiy e’lon qilingan kundan e’tiboran 3 oy o‘tgach kuchga kiradi.
