O‘zbekiston musulmonlari idorasi qabristonlarni obod qilishga chaqirdi

O‘zbekiston musulmonlari idorasi Ulamolar kengashi qabristonlarni obod qilish va ziyorat odoblariga oid murojaatini e’lon qildi.

 

Murojaatda qayd etilishicha, mamlakatda ajdodlarni xotirlash, ularning xotirasini e’zozlash hamda qabristonlarni obod qilish ezgu an’ana sifatida qaraladi. Shuningdek, muqaddas dinimizda marhumlarni ziyorat qilish, ularning haqqiga duo qilish va qabrlarga hurmat bilan yondashish targ‘ib etilgani ta’kidlangan.

 

Idora bayonotida yaqin yillarda yurt bo‘ylab, jumladan, Samarqandda Imom Buxoriy majmuasi atrofida keng ko‘lamli obodonlashtirish ishlari amalga oshirilgani eslatib o‘tilgan.

 

Shuningdek, qabristonlar insonni tafakkurga chorlovchi, hayotning o‘tkinchiligi va oxirat haqiqatini eslatuvchi maskan ekani ta’kidlangan.

 

Idora ayrim hududlarda qabristonlarning qarovsiz qolishi, tozalik va tartib-intizom yetarli darajada emasligi kabi holatlarga ham e’tibor qaratgan. Bunday holatlar marhumlar xotirasiga nisbatan befarqlik sifatida baholanayotgani bildirilgan.

 

Murojaatda qabristonlarni doimiy ravishda toza va obod saqlash, ziyorat madaniyatiga rioya qilish hamda belgilangan tartiblarga amal qilish zarurligi qayd etilgan.

 

Shuningdek, ziyorat vaqtida poklikka rioya qilish, salom berish, duo va Qur’on tilovati qilish, qabrlarga hurmatsiz munosabatda bo‘lmaslik kabi odoblar eslatib o‘tilgan.

 

Bundan tashqari idora qabristonlarni obod qilish va ziyorat madaniyatini yuksaltirish maqsadida “Qabristonlarni obod qilish dolzarb oyligi” tashabbusini e’lon qildi.

 

Unga ko‘ra, mahalla aholisi, nuroniylar, imom-xatiblar va ziyolilar qabristonlarni tozalash va obodonlashtirish ishlariga keng jalb etiladi.

 

Tashabbus doirasida qabristonlarni tartibli saqlash, ko‘kalamzorlashtirish, ziyoratchilar uchun qulay sharoit yaratish hamda yoshlar o‘rtasida “Xotira va qadrlash” tushunchasini mustahkamlash rejalashtirilgan.