Putin Prezident Shavkat Mirziyoyevga minnatdorlik bildirdi
Rossiya prezidenti O‘zbekiston rahbarining tashqi bosimlarga qaramay Moskvaga kelganini alohida ta’kidladi.
Rossiya prezidenti Vladimir Putin O‘zbekiston Prezidenti Shavkat Mirziyoyevning 9-may kuni Moskva shahriga tashrifini yuqori baholab, uni ikki davlat o‘rtasidagi alohida munosabatlarning yorqin ifodasi deb atadi. Bu haqda Rossiya prezidenti matbuot xizmati xabar berdi.
Ikki davlat rahbarlari o‘rtasidagi uchrashuv chog‘ida Putin bugungi murakkab xalqaro sharoitda o‘tkazilayotgan uchrashuvlar nafaqat do‘stlik, balki qardoshlik hamkorligining ham muhim belgisi ekanini ta’kidlagan.
Rossiya rahbari Shavkat Mirziyoyevning “tashqi signallar va tahdidlarga qaramay” Moskvaga tashrif buyurganini alohida qayd etib, O‘zbekiston prezidentiga do‘stlik va G‘alaba tadbirlaridagi ishtiroki uchun minnatdorlik bildirgan.
Shuningdek, Vladimir Putin O‘zbekiston bilan strategik sheriklik va ittifoqchilik munosabatlari izchil rivojlanayotganini ta’kidlagan.
Eslatib o‘tamiz, 8-may kuni O‘zbekiston Prezidenti amaliy tashrif bilan Moskva shahriga jo‘nab ketgani va tashrif dasturiga muvofiq, davlat rahbari Ikkinchi jahon urushidagi g‘alabaning 81 yilligiga bag‘ishlangan tantanali tadbirlarda ishtirok etgani xabar berilgan edi.
