Sohada 5 yillik mehnat stajiga ega ayollar OTMga tavsiyanoma asosida qabul qilinadi
Tavsiyanoma 3 yil davomida amal qiladi.
O‘zbekistonda mehnat tajribasiga ega xotin-qizlarning oliy ta’lim olish imkoniyatlarini kengaytirishga qaratilgan yangi dastur ishga tushirildi. Endilikda mutaxassisligi bo‘yicha kamida 5 yillik mehnat stajiga ega, biroq oliy ma’lumot olmagan ayollar davlat oliy ta’lim muassasalariga kirish uchun tavsiyanoma olishlari mumkin.
Mazkur tashabbus Oila va xotin-qizlar qo‘mitasi tomonidan amalga oshirilmoqda. Dastur doirasida davlat OTMlariga kirish uchun xotin-qizlarga alohida 500 ta kvota ajratilgan.
Tavsiyanoma olish uchun nomzodlar o‘rta maxsus yoki kasb-hunar ta’limi diplomiga ega bo‘lishi, mutaxassisligi bo‘yicha kamida 5 yil ishlagan bo‘lishi hamda bakalavr darajasidagi oliy ma’lumotga ega bo‘lmasligi lozim.
Tanlov kirish imtihonlari natijalari asosida amalga oshiriladi. Eng yuqori ball to‘plagan 500 nafar xotin-qiz talabalikka tavsiya etiladi.
Tavsiyanoma 3 yil muddat davomida amal qiladi va undan faqat bir marta foydalanish mumkin. Dastur xorijiy, nodavlat hamda harbiy oliy ta’lim muassasalariga tatbiq etilmaydi.
Arizalarni my.gov.uz portali orqali onlayn topshirish mumkin. Hujjatlar joriy yilning 1-iyuniga qadar qabul qilinadi.
