Xantavirusning O‘zbekistonda tarqalish ehtimoli bormi?

 

So‘nggi kunlarda ijtimoiy tarmoqlarda ayrim davlatlarda xantavirus infeksiyasi tarqalayotgani haqida turli xabarlar keng muhokama qilinmoqda. Shu munosabat bilan Sanitariya-epidemiologik osoyishtalik va jamoat salomatligi qo‘mitasi mamlakatimizdagi epidemiologik vaziyat yuzasidan rasmiy ma’lumot berdi.

Qo‘mita raisining birinchi o‘rinbosari Nurmat Atabekovning ta’kidlashicha, ayni paytda O‘zbekistonda xantavirus bilan bog‘liq epidemiologik vaziyat barqaror bo‘lib, kasallanish holatlari qayd etilmagan.

Qayd etilishicha, Jahon sog‘liqni saqlash tashkiloti ma’lumotlariga ko‘ra, xantavirus koronavirus kabi tez tarqalish xususiyatiga ega emas hamda global pandemiyaga sabab bo‘lmaydi.

Mutaxassislarning ma’lum qilishicha, xantavirusning 20 dan ortiq turi mavjud bo‘lib, ulardan faqat ayrimlari insonlarda kasallik keltirib chiqarishi mumkin. Infeksiya asosan kemiruvchilar orqali yuqadi. Virus zararlangan chang, oziq-ovqat mahsulotlari yoki kemiruvchilar ajratmalari orqali inson organizmiga tushishi mumkin.

Kasallik ko‘pincha tana haroratining ko‘tarilishi, bosh og‘rig‘i, holsizlik, ko‘ngil aynishi, qusish, mushak va qorin sohasidagi og‘riqlar bilan namoyon bo‘ladi. Og‘ir holatlarda esa buyrak yetishmovchiligi hamda yurak-qon tomir va nafas olish tizimi bilan bog‘liq asoratlar kuzatilishi mumkin.

Hozirgi kunda xantavirusga qarshi maxsus vaksina yoki aniq davolash protokoli mavjud emas. Shu bois mutaxassislar profilaktik choralarга qat’iy amal qilish muhimligini ta’kidlamoqda.

Fuqarolarga shaxsiy gigiyena qoidalariga rioya qilish, yashash va ish joylarini ozoda saqlash, oziq-ovqat mahsulotlarini xavfsiz sharoitda saqlash, meva-sabzavotlarni yaxshilab yuvish hamda yopiq xonalarni muntazam shamollatib turish tavsiya etildi.

Shuningdek, mamlakatimizda epidemiologik vaziyatni barqaror saqlash va chetdan kirib kelishi mumkin bo‘lgan kasalliklarning oldini olish maqsadida 53 ta chegara punktida doimiy sanitariya nazorati yo‘lga qo‘yilgani ma'lum qilindi.