Bolalar ombudsmani faoliyatiga to‘sqinlik qilganlik uchun ma’muriy javobgarlik joriy etilmoqda
Bola huquqlari bo‘yicha vakili huquqiy maqomi va vakolatlari ta’sirchanligi kuchaytirilmoqda.
Oliy Majlis Qonunchilik palatasining navbatdagi yalpi majlisida “O‘zbekiston Respublikasi Oliy Majlisining Bola huquqlari bo‘yicha vakili (Bolalar ombudsmani) to‘g‘risida”gi qonun munosabati bilan ayrim qonun hujjatlariga qo‘shimcha va o‘zgartirishlar kiritishni nazarda tutuvchi qonun loyihasi ko‘rib chiqildi.
Qayd etilishicha, mazkur loyiha orqali 13 ta qonun hujjatiga tegishli o‘zgartirish va qo‘shimchalar kiritilishi belgilangan bo‘lib, ular Bolalar ombudsmani institutining huquqiy maqomi va vakolatlarini yanada kuchaytirishga qaratilgan.
Xususan, yangi tartiblarga ko‘ra, huquqni muhofaza qiluvchi organlar tomonidan bolalarga qarshi sodir etilgan jinoyatlar yuzasidan Bola huquqlari bo‘yicha vakilni majburiy ravishda xabardor qilish tartibi joriy etiladi. Shuningdek, Bolalar ombudsmaniga bunday jinoyatlar bo‘yicha ish materiallari bilan tanishish huquqi beriladi.
Qonun loyihasida ozodlikdan mahrum etilgan voyaga yetmaganlar, qamoqqa olingan va ushlab turilgan shaxslarning murojaatlarini Bola huquqlari bo‘yicha vakilga yuborish tartibi ham aniq belgilab qo‘yilmoqda.
Bundan tashqari, “Davlat boji to‘g‘risida”gi qonunga kiritilayotgan o‘zgartirishlarga muvofiq, Bolalar ombudsmani bola manfaatlari yuzasidan sudlarga murojaat qilganda davlat bojini to‘lashdan ozod etiladi.
Hujjatda, shuningdek, parlament palatalari tomonidan Bola huquqlari bo‘yicha vakilning daxlsizlik huquqiga oid masalalarni ko‘rib chiqish hamda uning ma’ruzasini eshitish tartiblari ham mustahkamlanmoqda.
Shu bilan birga, Bola huquqlari bo‘yicha vakilning qonuniy faoliyatiga to‘sqinlik qilganlik uchun ma’muriy javobgarlikni nazarda tutuvchi alohida normalar ham joriy etilmoqda.
Ta’kidlanishicha, ushbu qonun loyihasi Bolalar ombudsmani faoliyatining institutsional mustaqilligini kuchaytirish, bola huquqlariga oid qonunchilik ijrosi ustidan parlament nazoratini yanada samarali tashkil etishga xizmat qiladi.
Yig‘ilish yakunida qonun loyihasi deputatlar tomonidan ikkinchi o‘qishda qabul qilindi.
