O‘qituvchilar farzandlari uchun kontraktning 30 foizi qoplab berilishi mumkin
Chegirma magistratura, sirtqi, kechki, masofaviy, qo‘shma dasturlar hamda super-kontrakt shakllariga tatbiq etilmaydi.
O‘zbekistonda davlat oliy ta’lim muassasalarida tahsil olayotgan pedagoglar farzandlariga kontrakt to‘lovining 30 foizigacha chegirma berilishi mumkin. Bu haqdagi hukumat qarori loyihasi jamoatchilik muhokamasi uchun e’lon qilindi.
Loyihaga ko‘ra, 2026/27-o‘quv yilidan boshlab davlat OTMlariga o‘qishga kirgan va tahsil olayotgan pedagoglar farzandlari uchun yillik to‘lov-kontrakt summasining 30 foizi qoplab beriladi.
Chegirma faqat bir o‘quv yili uchun bir marotaba qo‘llanadi. Masalan, agar yillik kontrakt summasi 15 mln so‘m bo‘lsa, talabaga 4,5 mln so‘m chegirma beriladi va to‘lov 10,5 mln so‘mni tashkil etadi.
Talaba o‘zi tahsil olayotgan OTM rektori nomiga “Talabalarga shartnoma asosida ko‘rsatiladigan xizmatlar hisobini yuritish axborot tizimi” — kontrakt.edu.uz platformasi orqali ariza yuboradi.
Pedagog maqomi “Elektron hukumat” tizimi orqali avtomatik tekshiriladi. Agar noto‘g‘ri ma’lumot taqdim etilgani aniqlansa, qayta hisob-kitob amalga oshiriladi.
Qaror loyihasida chegirma magistratura, sirtqi, kechki, masofaviy, qo‘shma dasturlar hamda super-kontrakt shakllariga tatbiq etilmasligi belgilangan.
Shuningdek, talabgorning ota-onasi pedagog toifasidan chiqarilsa, keyingi o‘quv yilidan boshlab chegirma bekor qilinadi.
Mazkur tashabbusni moliyalashtirish 2026-yilda Oliy ta’lim, fan va innovatsiyalar vazirligiga ajratilgan byudjet mablag‘lari hisobidan amalga oshiriladi. 2027-yildan boshlab esa xarajatlar davlat byudjeti parametrlarida alohida nazarda tutiladi.
Hujjat loyihasini ishlab chiqishda Avstriya, Buyuk Britaniya, Shvetsiya, Kanada va Fransiya kabi davlatlarning oliy ta’lim tizimidagi tajribalar o‘rganilgani qayd etilgan.
Qaror loyihasi muhokamasi 29-mayga qadar davom etadi.
Avvalroq O‘zbekistonda yuqori malaka toifasiga ega pedagoglarga ipoteka kreditlari bo‘yicha subsidiya ajratish yo‘lga qo‘yilgani, shuningdek, attestatsiya to‘lovlari 50 foizga kamaytirilgani ma’lum qilingan edi.
