Husanovning ikkinchi sovrini: “Manchester Siti” Angliya Kubogi g‘olibi bo‘ldi
Abduqodir Husanov musobaqada g‘alaba qozongan ilk o‘zbekistonlik futbolchiga aylandi.
Londondagi “Uembli” stadionida Angliya Kubogi final uchrashuvi bo‘lib o‘tdi. Unda “Manchester Siti” va “Chelsi” jamoalari o‘zaro kuch sinashdi.
Qiziqarli kechgan final bahsida “Manchester Siti” 1:0 hisobida g‘alaba qozonib, 2025/26-yilgi mavsum Angliya Kubogi sohibiga aylandi. Uchrashuv taqdirini ikkinchi bo‘limda kiritilgan yagona gol hal qildi.
Gol 72-daqiqada Erling Holandning aniq uzatmasidan so‘ng Antuan Semenyo tomonidan kiritildi. “Chelsi” jamoasi o‘yinning so‘nggi daqiqalarigacha hisobni tenglashtirishga harakat qilgan bo‘lsa-da, natijani o‘zgartira olmadi.
O‘zbekiston terma jamoasi himoyachisi Abduqodir Husanov uchrashuvni asosiy tarkibda boshladi va to‘liq 90 daqiqa maydonda harakat qildi. Futbolchi 56-daqiqada raqib futbolchisi Mark Kukurelyaga nisbatan qo‘pol harakati uchun sariq kartochka bilan jazolandi.
Mazkur sovrin Husanov uchun “Manchester Siti” tarkibidagi ikkinchi yirik sovrin bo‘lib, u avval Angliya Liga Kubogida ham g‘oliblikni qo‘lga kiritgan edi.
