Namangan, Jizzax va Qashqadaryoda kuzatilgan sel oqimlari uy-joylarga zarar yetkazmadi — FVV
Qashqadaryo viloyatining ayrim tumanlarida sel suvlarining avtomobil yo‘llariga chiqishi sababli qisqa muddatli cheklovlar yuzaga kelgan.
Favqulodda vaziyatlar vazirligi 19-may kuni Qashqadaryo, Namangan va Jizzax viloyatlarida kuzatilgan sel oqimlari yuzasidan ma’lumot berdi.
Vazirlik xabariga ko‘ra, Qashqadaryo viloyatining Qamashi, Yakkabog‘, Dehqonobod va Shahrisabz tumanlarida kuchli yog‘ingarchiliklar kuzatilgan. Qamashi tumanidagi “Qiziltepa” mahallasi Tegirmon qishlog‘i hududida yomg‘irlar natijasida Maydanak avtomobil yo‘liga sel-suvlari chiqib ketgan va yo‘l qisqa muddatga yopilgan.
Shuningdek, Namangan viloyatining Pop tumani “Imom ota” mahallasi hamda Jizzax viloyatining G‘allaorol tumani “Lalmikor” mahallasi hududlarida ham kuchli yog‘ingarchilik oqibatida sel oqimlari kuzatilgan.
Pop tumanida tog‘ va adirliklarda shakllangan sel suvlar “Xazorat” ko‘chasidan oqib o‘tgan bo‘lsa-da, aholi xonadonlariga zarar yetmagan. G‘allaorol tumanida kuzatilgan sel oqimlari ham sel yo‘llari orqali o‘tib, kommunikatsiya tarmoqlari, yo‘l infratuzilmasi hamda turar joylarga ta’sir ko‘rsatmagan.
Favqulodda vaziyatlar vazirligi va tegishli tashkilotlar xodimlari hodisa joylariga yetib borib, vaziyat oqibatlarini tezkorlik bilan bartaraf etgan. Zararli oqibatlar qayd etilmagan.
