Qabristonlarni obodonlashtirishga 3-yil uchun 1,6 trln so‘m ajratiladi
Har bir qabriston uchun alohida shaxsiy hisobvaraq ochiladi va xayriya mablag‘larini qabul qilish uchun QR-kod tizimi joriy etiladi.
Vazirlar Mahkamasi qabristonlarni obodonlashtirish ishlarini tizimli tashkil etish bo‘yicha yangi qaror qabul qildi. Bu haqda O‘zA xabar berdi.
Qarorga asosan, O‘zbekistondagi 10 mingdan ortiq qabristonni ta’mirlash va obodonlashtirish uchun 2027–2029-yillarga mo‘ljallangan dastur doirasida jami 1,6 trln so‘m yo‘naltiriladi.
Qarorda qabristonlarning himoya devorlari, kirish darvozalari, bino-inshootlari hamda ichki yo‘l va yo‘laklarini ta’mirlash va qurish ishlari belgilangan tartibda moliyalashtirilishi ko‘zda tutilgan. Bunda mablag‘lar mahalliy byudjet, homiylik va xayriya mablag‘lari hamda qonunchilikda taqiqlanmagan boshqa manbalardan shakllantiriladi.
Shuningdek, har bir qabriston uchun alohida shaxsiy hisobvaraq ochiladi va xayriya mablag‘larini qabul qilish uchun QR-kod tizimi joriy etiladi. Tushgan mablag‘lar faqat qabristonlarni saqlash va obodonlashtirish ishlariga yo‘naltiriladi.
