Qurbon hayiti arafasida 8 mingdan ortiq bolaga 200 dollardan mablag‘ ajratiladi
Ehtiyojmand oilalar, bemor bolalar va masjidlar uchun 690 mlrd so‘m yo‘naltiriladi.
Shavkat Mirziyoyev Qurbon hayiti munosabati bilan ehtiyojmand aholini ijtimoiy-iqtisodiy jihatdan qo‘llab-quvvatlashga doir takliflar taqdimoti bilan tanishdi. Bu haqda Prezident matbuot xizmati xabar berdi.
Ma’lum qilinishicha, taqdimotda O‘zbekiston musulmonlari idorasi, Ijtimoiy himoya milliy agentligi, Sog‘liqni saqlash vazirligi, Iqtisodiyot va moliya vazirligi, O‘zbekiston mahallalari uyushmasi hamda Vaqf xayriya jamoat fondi tomonidan ishlab chiqilgan takliflar ko‘rib chiqildi.
Unga ko‘ra, Qurbon hayiti arafasida keng ko‘lamli ijtimoiy tadbirlar amalga oshiriladi. Jumladan, 10 ming nafar og‘ir va nogironlikka olib keluvchi kasalliklarga chalingan bolalarda jarrohlik amaliyotlari o‘tkazish, 2,3 ming nafar onkologik va gematologik bemorlarni tekshiruv hamda davolashdan o‘tkazish, kamida 350 nafar bemorda jigar va buyrak transplantatsiyasi xarajatlarini qoplash rejalashtirilgan.
Shuningdek, 8 mingdan ortiq yetim va ota-ona qaramog‘idan mahrum bo‘lgan bolalar hamda Vatan himoyasida halok bo‘lganlarning farzandlari uchun omonat hisobvaraqlariga 200 AQSh dollari miqdorida mablag‘ o‘tkazilishi ko‘zda tutilgan.
Bundan tashqari, 500 ta masjidda tahoratxonalarni qurish yoki ta’mirlash, qabristonlarni obodonlashtirish, ijtimoiy himoyaga muhtoj oilalarni oziq-ovqat mahsulotlari bilan ta’minlash ham rejalashtirilgan.
Mazkur tadbirlar 690 milliard so‘m mablag‘ hisobidan moliyalashtirilishi belgilangan. Prezident mutasaddilarga barcha ishlarni shaffof va manzilli tashkil etish bo‘yicha topshiriqlar berdi.
