Pep Gvardiola “Manchester Siti” bosh murabbiyligidan ketmoqda
U 2016-yildan buyon “Manchester Siti”ni boshqarib kelgan va 20 ta yirik sovrinni, jumladan 6 ta Angliya chempionligini qo‘lga kiritgan.
Angliyaning Manchester Siti klubi bosh murabbiyi Pep Guardiola mavsum yakunida jamoani tark etadi. Bu haqda klubning rasmiy sayti orqali ma’lum qilindi.
Klub bayonotida qayd etilishicha, kataloniyalik mutaxassis 2016-yil iyul oyida jamoani qabul qilib olganidan buyon “Manchester Siti” tarixidagi eng muvaffaqiyatli davrlardan birini yaratgan.
Pep Gvardiola boshqaruvi ostida “shaharliklar” 20 ta yirik sovrinni qo‘lga kiritgan. Jumladan, jamoa 6 marta Angliya Premer-ligasi chempioni bo‘lgan, 3 martadan Angliya Kubogi va Angliya Superkubogida zafar quchgan hamda 5 bor Angliya Liga kubogini qo‘lga kiritgan.
Xalqaro maydonda esa “Manchester Siti” ilk bor UEFA Chempionlar Ligasi, UEFA Superkubogi va Klublar o‘rtasidagi Jahon chempionatida g‘olib chiqqan.
Ma’lum qilinishicha, Gvardiola klub bosh murabbiyligidan ketganidan so‘ng ham City Football Group tizimida faoliyatini davom ettiradi. U global elchi sifatida guruh tarkibidagi klublarga texnik maslahatlar berish hamda xalqaro loyihalarda ishtirok etishi rejalashtirilgan.
Shuningdek, xabarlarga ko‘ra, jamoaning yangi bosh murabbiyi sifatida Enzo Maresca tayinlanishi kutilmoqda. Pep Gvardiola uning nomzodini qo‘llab-quvvatlagan.
Joriy mavsumda “Manchester Siti” Angliya Premer-ligasida Arsenaldan ortda qolib, musobaqani ikkinchi o‘rinda yakunlagan edi.
