Qamchiq dovonida sel sabab harakat vaqtincha cheklandi
Loy, tuproq va shag‘al aralash sel yo‘lning qatnov qismiga tushgan.
“Qamchiqavtoyo‘l” ixtisoslashtirilgan yo‘llardan foydalanish korxonasi” davlat muassasasining ma’lum qilishicha, 22-may kuni A-373 Toshkent–Ohangaron–Angren–Qo‘qon–Shahrixon–Andijon avtomobil yo‘lining 129,9-kilometr qismida tog‘ yon bag‘ridan loy, tuproq va shag‘al aralash sel suvlari yo‘lning qatnov qismiga tushgan.
Yuzaga kelgan vaziyat sabab Vodiy—Toshkent yo‘nalishida avtomobillar harakati xavfsizlik nuqtai nazaridan vaqtinchalik bir tasmaga yo‘naltirilgan.
Muassasa hamda Favqulodda vaziyatlar vazirligi ma'lumotiga ko'ra, hozirda hududda tegishli tashkilotlar mutaxassislari tomonidan sel oqibatlarini bartaraf etish ishlari olib borilmoqda.
Qayd etilishicha, avtomobillar harakati nazorat ostida davom ettirilmoqda. Haydovchilardan ehtiyotkor bo‘lish, belgilangan xavfsizlik qoidalariga qat’iy amal qilish so‘ralgan.
