Emmanuel Makronning qarorgohida tintuv o‘tkazildi
Parijning moliyaviy jinoyatlar bo‘yicha ikki tergov sudyasi prezident qarorgohida protsessual harakatlarni amalga oshirgan.
Fransiyaning Le Monde nashri xabariga ko‘ra, Emmanuel Makronning rasmiy qarorgohi — Élysée Palaceda davlat xaridlari bilan bog‘liq tergov doirasida tintuv o‘tkazildi.
Ma’lum qilinishicha, 21-may kuni Parijning moliyaviy jinoyatlar bo‘yicha ikki tergov sudyasi prezident qarorgohida protsessual harakatlarni amalga oshirgan. Tergov Panteondagi xotira marosimlarini tashkil etish uchun tuzilgan davlat shartnomalari bilan bog‘liq holatlar yuzasidan olib borilmoqda.
Nashr ma’lumotiga ko‘ra, tergov markazida marosimlarni tashkil etish bilan shug‘ullangan Shortcut Events kompaniyasiga bir necha davlat buyurtmalarining berilishi masalasi turibdi. Mazkur tadbirlar so‘nggi yillarda davlat rahbari ishtirokida o‘tkazilgan.
Shuningdek, xabarda qayd etilishicha, joriy yil 14-aprel kuni ham tergovchilar Yelisey saroyida tintuv o‘tkazishga uringan, biroq prezident ma’muriyatiga oid binolarning daxlsizligi bilan bog‘liq konstitutsiyaviy me’yorlar sabab ularga kirishga ruxsat berilmagan.
Tergov doirasida avvalroq Centre des Monuments Nationales tashkiloti, Shortcut Events kompaniyasi ofislari hamda ishga aloqador shaxslarning uylarida ham tintuvlar o‘tkazilgani aytilmoqda.
Hozircha Fransiya prezidenti administratsiyasi mazkur tergov yuzasidan rasmiy izoh bermagan.
