Qashqadaryoda FVV ofitseri cho'kayotgan bolani qutqarib qoldi
Bola velosipedda ketayotib, muvozanatni yo‘qotgan va daryoga tushib ketgan.
Qashqadaryo viloyati Kitob tumanida FVV xodimi daryoga cho‘kayotgan 9 yoshli bolani qutqarib qoldi. Bu haqda FVV xabar berdi.
Ma’lum qilinishicha, hodisa 23 may kuni soat 17:00 atrofida tumanning “Bog‘bon” mahallasida sodir bo‘lgan. 9 yoshli bola velosipedda ketayotib muvozanatini yo‘qotgan va Qashqadaryo daryosiga tushib ketgan.
Voqeani ko‘rgan bolaning akasi atrofdagilarni yordamga chaqira boshlagan. Shu payt daryo yaqinida yashovchi Favqulodda vaziyatlar vazirligi xodimi, mayor Husniddin Sharapov bolalarning ovozini eshitib qolgan va zudlik bilan suvga sakrab, bolani qutqarib olgan.
Xabarga ko‘ra, hozirda bola uyida bo‘lib, ahvoli yaxshi.
