Qurbon hayiti munosabati bilan Toshkentdan hududlarga qo‘shimcha aviaqatnovlar yo‘lga qo‘yiladi
Ushbu reyslar orqali qariyb 9 ming nafarga yaqin yo‘lovchini o‘z manziliga yetkazish rejalashtirilgan.
Qurbon hayiti bayrami arafasida Toshkentdan Buxoro, Termiz, Urganch va Nukus yo‘nalishlarida qo‘shimcha aviaqatnovlar yo‘lga qo‘yiladi. Bu haqda Transport vazirligi xabar berdi.
Ma’lum qilinishicha, 25–31 may kunlari “Uzbekistan Airways”, “Silk Avia” hamda “Centrum Air” aviakompaniyalari tomonidan ushbu yo‘nalishlarda borish va qaytish uchun jami 28 ta qo‘shimcha reys amalga oshiriladi.
Qo‘shimcha qatnovlarning 10 tasi Toshkent — Urganch — Toshkent, 7 tasi Toshkent — Buxoro — Toshkent, yana 7 tasi Toshkent — Termiz — Toshkent hamda 4 tasi Toshkent — Nukus — Toshkent yo‘nalishlariga to‘g‘ri keladi.
Ushbu qatnovlar orqali qariyb 9 ming nafarga yaqin yo‘lovchini o‘z manziliga yetkazish rejalashtirilgan.
Ayni paytda amaldagi jadvalga ko‘ra, haftasiga Toshkent — Buxoro yo‘nalishida 23 ta, Toshkent — Termiz yo‘nalishida 23 ta, Toshkent — Urganch yo‘nalishida 35 ta hamda Toshkent — Nukus yo‘nalishida 16 ta reys bajarilmoqda. Umumiy haftalik qatnovlar soni 97 tani tashkil etadi.
