O'zbekiston Qurbon hayiti arafasida Afg‘onistonga navbatdagi insonparvarlik yordami yubordi
Balx viloyatiga 200 tonna oziq-ovqat mahsulotidan iborat gumanitar yordam yetkazildi.
O'zbekiston tomonidan Qurbon hayiti munosabati bilan hamda Afg'oninstonning sel-suv toshqinlaridan jabr ko‘rgan aholisini qo‘llab-quvvatlash maqsadida navbatdagi insonparvarlik yordami yetkazilgan. Bu haqda Surxondaryo viloyati hokimligi ma'lum qildi.
Shavkat Mirziyoyev topshirig‘iga binoan yuborilgan qariyb 200 tonna oziq-ovqat mahsulotlari ortilgan insonparvarlik yuklari Afg‘onistonning Balx viloyatiga olib borilgan.
Insonparvarlik yordamini topshirish marosimi Hayraton shahridagi “Astras” kompaniyasi hududida bo‘lib o‘tgan. Unda O‘zbekiston Prezidentining Afg‘oniston bo‘yicha maxsus vakili Ismatilla Irgashev, Surxondaryo viloyati hokimi Ulug‘bek Qosimov hamda Balx viloyati gubernatori o‘rinbosari Nurulhodi Abuidris va ikki tomon rasmiylari ishtirok etgan.
Yuk tarkibidan un, guruch, shakar, makaron va qandolat mahsulotlari, o‘simlik yog‘i, no‘xot hamda tez tayyorlanadigan oziq-ovqat mahsulotlari o‘rin olgan.
Afg‘oniston tomoni O‘zbekiston Prezidenti va xalqiga ko‘rsatilayotgan doimiy insonparvarlik ko‘magi uchun minnatdorlik bildirib, Qurbon hayiti munosabati bilan samimiy tabriklarini yo‘llagan.
