Fohishalikka jalb etishmoqchi bo‘ldi: Toshkent aeroportida odam savdosining oldi olindi
Gumonlanuvchi jabrlanuvchiga chet elda mo‘may daromad topishni va’da qilgan.

Toshkent xalqaro aeroportida 26 yoshli Ohangaron shahrida yashovchi ayolni jinsiy ekspluatatsiya qilish maqsadida Turkiyaga yuborishga urinish fosh etildi. Bu haqda Toshkent viloyati Ichki ishlar bosh boshqarmasi xabar berdi.
Ma’lum qilinishicha, holat «Xavfsiz va sog‘lom yurt» keng ko‘lamli tezkor-profilaktik tadbirining uchinchi bosqichi doirasida IIV va Davlat xavfsizlik xizmati xodimlari hamkorligida aniqlangan.
Tezkor tadbir davomida Olmaliq shahrida yashovchi ayol qo‘lga olingan. Tergov ma’lumotlariga ko‘ra, u Istanbulda yashovchi tanishi bilan oldindan til biriktirib, Ohangaron shahrida yashovchi ayolni aldov yo‘li bilan Turkiyaga yuborishga uringan.
Gumonlanuvchi jabrlanuvchini chet elda mo‘may daromad topishiga ishontirib, uni Istanbulga shahvoniy ekspluatatsiya va fohishalik maqsadida olib ketayotgan vaqtda aeroportda daliliy ashyolar bilan ushlangan. Jabrlanuvchini Istanbulda boshqa bir o‘zbekistonlik ayol kutib olishi kerak bo‘lgan.
Mazkur holat yuzasidan Jinoyat kodeksining 135-moddasi (odam savdosi) bilan jinoyat ishi qo‘zg‘atilgan. Hozirda tergov harakatlari olib borilmoqda.








