O‘zbekiston Hindiston bilan JSTga qo‘shilish bo‘yicha muzokaralarni yakunladi
Tomonlar o‘rtasida bozorga kirish masalalari bo‘yicha protokol imzolandi.
O‘zbekiston Hindiston bilan Jahon savdo tashkiloti (JST)ga qo‘shilish bo‘yicha ikki tomonlama muzokaralarni muvaffaqiyatli yakunladi. Bu haqda Prezidentning JST masalalari bo‘yicha maxsus vakili Azizbek Urunov ma’lum qildi.
Qayd etilishicha, tomonlar bozorga kirish masalalari bo‘yicha muzokaralarni yakunlovchi protokolni imzolagan. Mazkur kelishuv aslida 2024-yilda erishilgan bo‘lib, keyingi davrda hujjat matni va texnik tafsilotlarni yakuniy kelishish ishlari olib borilgan.
Azizbek Urunovning ta’kidlashicha, Hindiston muzokaralar davomida bozorga kirish masalalarida konstruktiv yondashuv namoyish etgan.
Shuningdek, u Hindiston tomoniga O‘zbekistonning JSTga qo‘shilish jarayonini qo‘llab-quvvatlagani uchun minnatdorlik bildirgan.
Ma’lum qilinishicha, O‘zbekiston delegatsiyasi yaqin kunlarda imzolangan protokolning asl nusxasini JST Kotibiyatiga topshiradi. Hujjat tashkilotning rasmiy materiallari to‘plamiga kiritiladi.
